Prezident Administratsiyasining huquqiy maqomi va vakolatlari ilk bor qonun darajasida belgilandi
Ilgari Administratsiya Prezident faoliyatini ta’minlovchi yagona konstitutsiyaviy organ hisoblansa-da, uning boshqa davlat idoralari bilan munosabatlarini tartibga soluvchi yaxlit qonuniy asos mavjud emas edi. Qabul qilingan 4 ta bob va 34 ta moddadan iborat yangi Konstitutsiyaviy qonun ushbu idorani bevosita Prezident tomonidan shakllantiriladigan, unga bo‘ysunadigan hamda hisobdor bo‘lgan alohida davlat organi sifatida rasmiylashtirdi.
Hujjat bilan Administratsiyaning asosiy vazifalari va vakolat doirasi aniq belgilab berildi. Endilikda ushbu organ Prezident farmon va qarorlari loyihalarini tayyorlash, qonunlarni imzoga yoki qaytarishga hozirlash, Prezidentga bevosita bo‘ysunuvchi idoralar faoliyatini muvofiqlashtirish va Oliy Majlisga Murojaatnomani tashkil etish kabi muhim funksiyalarni qonuniy darajada amalga oshiradi. Shuningdek, Administratsiya rahbarining huquqiy maqomi hamda huzurdagi Xavfsizlik kengashi faoliyatining qonuniy asoslari mustahkamlandi.
Bundan tashqari, qonunda Administratsiyaning parlament, Hukumat, sud va mahalliy hokimliklar bilan hamkorlik qilish tartibi o‘z aksini topgan. Shuningdek, idora xodimlari uchun o‘z vazifalarini bajarish davomida zarur bo‘ladigan ijtimoiy, iqtisodiy va huquqiy himoya choralari ham nazarda tutilgan. Mutassaddilarga ko‘ra, bu o‘zgarishlar Prezidentlik boshqaruvining institutsional standartlarini kuchaytirishga xizmat qiladi.
