Rossiyada jazo o‘tayotgan o‘zbekistonlik ayollarning farzandlari Vatanga qaytarildi
O‘zbekistonning Qozon shahridagi Bosh konsulxonasi sa’y-harakatlari bilan Rossiyada jazo o‘tayotgan vatandoshlarning uch nafar voyaga yetmagan farzandi O‘zbekistonga qaytarildi. Bu haqda “Dunyo” axborot agentligi xabar qildi.
Ma’lum qilinishicha, bolalarni Vatanga olib kelish bo‘yicha muzokaralar uzoq vaqt davomida olib borilgan. Jarayon Rossiyaning vakolatli davlat idoralari bilan hamkorlikda amalga oshirilgan.
Xususan, voyaga yetmaganlarning O‘zbekiston fuqaroligiga mansubligi, mamlakatda yaqin qarindoshlari borligi va ularning sharoitlari o‘rganilgan. Shuningdek, bolalarni qaytarish uchun zarur hujjatlar rasmiylashtirilib, tegishli tashkiliy masalalar hal qilingan.
Ko‘rilgan choralar natijasida Mordoviya Respublikasidagi jazoni ijro etish muassasasi qoshidagi bolalar uyida tarbiyalanayotgan voyaga yetmaganlar O‘zbekiston Bosh konsulxonasi diplomatlari hamda mamlakatdan maxsus yuborilgan Ichki ishlar vazirligi xodimlari hamrohligida qabul qilib olingan va O‘zbekistonga olib kelingan.
Bosh konsulxona ma’lumotiga ko‘ra, Rossiyadagi jazoni ijro etish muassasalari qoshidagi bolalar uylarida bo‘lgan o‘zbekistonlik voyaga yetmaganlarni Vatanga qaytarish ishlari tizimli ravishda davom ettirilmoqda.
