Uchtepadagi 26 yoshli ayol o‘ldirilib, uyi yoqib yuborilgani haqidagi xabarlarga rasmiy munosabat berildi
Ijtimoiy tarmoqlarda Toshkent shahri Uchtepa tumanida 26 yoshli ayol o‘ldirilib, uyi yoqib yuborilgani aytilgan videolar tarqalgan edi. Holat yuzasidan qasddan odam o‘ldirish aybi bilan jinoyat ishi qo‘zg‘atildi. Bu haqda Bosh prokuratura Portal24.uz’ga xabar berdi.
Qayd etilsihicha, holat 2026-yil 24-oktyabr kuni soat 02:00 atrofida Toshkent shahri Uchtepa tumanidagi xonadonlardan birida yong‘in sodir bo‘lgan. Hodisa joyida shu uyda yashab kelgan, 2000-yil 30-mayda tug‘ilgan ayolning jasadi aniqlangan. Marhumaning tanasida yelka qismidan son qismigacha termik jarohatlar bo‘lgan.
Xonadonni ko‘zdan kechirish davomida oshxona, yotoqxona va mehmonxonada bir-biriga bog‘liq bo‘lmagan uchta yong‘in o‘chog‘i aniqlangan. Shuningdek, qasddan o‘t qo‘yish alomatlari qayd etilgan.
Mazkur holat yuzasidan 2026-yil 24-oktyabr kuni Uchtepa tumani prokuraturasi Jinoyat kodeksining 97-moddasi 1-qismi (Qasddan odam o‘ldirish) bilan jinoyat ishi qo‘zg‘atgan. Hozirda dastlabki tergov harakatlari olib borilmoqda. Tergov yakunlariga ko‘ra qonuniy qaror qabul qilinishi va holat bo‘yicha qo‘shimcha axborot berilishi bildirilgan.
