Ozarbayjon Qashqadaryodagi konda oltin qidirish ishlarini boshlamoqda
Yangi tashkil etilgan kompaniya Qashqadaryo viloyatida joylashgan Akba konida kompleks geologik qidiruv ishlarini olib boradi hamda oltin zaxiralarini baholaydi.
Hozirda hududda amaliy ishlarni boshlash uchun zarur ruxsatnomalarni rasmiylashtirish jarayoni ketmoqda. Hukumatning tegishli qarori chiqib, litsenziya berilgach, 18 oyga mo‘ljallangan geologik qidiruv va tadqiqot bosqichi yo‘lga qo‘yiladi.
Ushbu davr mobaynida mutaxassislar mavjud ma’lumotlarni tahlil qilib, kon zaxiralarini xalqaro JORC standartlari bo‘yicha baholaydi hamda metallurgik va ekologik sinovlarni o‘tkazadi. Yakunda loyihaning samaradorligini belgilovchi texnik-iqtisodiy asos ishlab chiqilib, konni sanoat miqyosida o‘zlashtirish bo‘yicha investitsiya taklifi tayyorlanadi.
Shuningdek, ozarbayjonlik investorlar Navoiy va Nurota oralig‘idagi istiqbolli maydonlarda foydali qazilmalarni qidirish uchun qo‘shma korxona tuzishni rejalashtirgan. Dastlabki ikki yillik ishlar natijasida iqtisodiy jihatdan kon unumdorligi tasdiqlansa, tomonlar obyektlarni birgalikda o‘zlashtirish bo‘yicha yangi loyihalarga qo‘l uradi.
