Oybek Tursunov Perfectum bosh ofisi va aktivlarini qariyb 98,4 milliard so‘mga sotib olmoqda
Bitimning umumiy qiymati qo‘shilgan qiymat solig‘i bilan birga 98,37 milliard so‘mni tashkil etadi.
Tegishli qaror operator egalari hisoblangan “Rubicon Wireless Communication” aksiyadorlarining navbatdan tashqari yig‘ilishida bir ovozdan ma’qullangan.
Sotuv obyekti Mirobod tumanining Taras Shevchenko ko‘chasida joylashgan bo‘lib, 0,72 gektar yer maydoni hamda umumiy maydoni 10,5 ming kvadrat metr bo‘lgan to‘rtta binoni o‘z ichiga oladi. Ushu ko‘chmas mulk majmuasining narxi 65,97 milliard so‘m deb baholangan. Shuningdek, shartnoma bo‘yicha kompaniyaning 32,41 milliard so‘mlik 2012 birlik boshqa asosiy vositalari ham tadbirkorga o‘tadi.
Ushbu yirik oldi-sotdi bitimi xalqaro VEON guruhi Perfectum operatorining 100 foiz aksiyalarini sotib olishini e’lon qilishidan uch kun avval tasdiqlangan. Keyinchalik, Beeline brendiga egalik qiluvchi VEON kompaniyasi operatorni qariyb 207 million dollarga xarid qilish bo‘yicha kelishuv imzolanganini ma’lum qildi. Raqobatni rivojlantirish qo‘mitasi bitimni ma’qullagan bo‘lib, unga ko‘ra Perfectum brendi kamida uch yil davomida o‘z mustaqilligini saqlab qolishi belgilangan.
