Ukraina dori-darmonlarini O‘zbekiston bozoriga yetkazib berishdagi g‘ovlar olib tashlanadi
Ukraina Sog‘liqni saqlash vaziri o‘rinbosari Yevgeniy Gonchar boshchiligidagi delegatsiyaning Toshkentga tashrifi doirasida dori-darmonlar savdosidagi ma’muriy va huquqiy to‘siqlarni bartaraf etish bo‘yicha muhim kelishuvlarga erishildi.
Muzokaralar davomida ikki mamlakat vakillari tibbiyot kafolatlari, dori vositalari narxini qoplash mexanizmlari, shifoxona xaridlari hamda aholini arzon va sifatli dori-darmonlar bilan ta’minlash masalalarini muhokama qildi. Shuningdek, tomonlar sog‘liqni saqlash tizimini rivojlantirish bo‘yicha o‘zaro tajriba almashishga kelishib oldi.
Uchrashuvda Rossiya va Ukraina o‘rtasidagi urush sababli ukrain farmatsevtika korxonalarida GMP tekshiruvlarini o‘tkazishda yuzaga kelayotgan qiyinchiliklar alohida ko‘rib chiqildi.
Shu bilan birga, yangilangan qonunchilik talablari sharoitida Ukraina tibbiyot kompaniyalarining O‘zbekiston bozoridagi faoliyatini saqlab qolish va ularning ulushini yanada oshirish imkoniyatlari atroflicha tahlil qilindi.
