O’zbekistonda jarrohlik operatsiyasi robot yordamida amalga oshirildi
Toshkentdagi Respublika ixtisoslashtirilgan travmatologiya va ortopediya markazida sun'iy intellekt bilan boshqariladigan robot-assistent yordamida tos-son bo'g'imi endoprotezlash operatsiyasi bajarildi. Jarayon Respublikamizning barcha viloyatlariga jonli translyatsiya qilindi.
Operatsiya tibbiyotni raqamlashtirish va aholiga yuqori texnologiyali xizmat ko'rsatish bo'yicha belgilangan vazifalar doirasida amalga oshirildi. Robot-assistent operatsiyadan oldin bemorning kompyuter tomografiyasi ma'lumotlarini tahlil qilib, virtual reja tuzgan. Operatsiyani shifokorlar bajargan, robot esa implantni to'g'ri burchak ostida o'rnatishga yordam bergan.
Markaz ma'lumotiga ko'ra, robot yordamidagi operatsiyada vaqt kam ketadi, implant aniq joylashtiriladi va asoratlar kamayadi. Operatsiyadan so'ng bemorlar tezroq reabilitatsiya qilinib, hayotiy faoliyatiga qaytishi mumkin. Shu kuni bolalarda son bo'g'imining tug'ma chiqishini tuzatish operatsiyasi ham muvaffaqiyatli o'tkazilgan. Operatsiyaga Xitoy shifokorlari ham qo'shilgan.
Bemor 12 yil davomida bo'g'im og'rig'idan aziyat chekkanini aytgan. Operatsiyadan keyin og'riqsiz yurish umidi paydo bo'lgan. Keyingi bosqichda bunday robot-assistent operatsiyalari hududiy filiallarda ham joriy etilishi rejalashtirilgan.
Eslatib o'tamiz, Ta’lim va ilm-fan vaziri Erkinjon Turdimov maktab direktorlarini vazirlik bilan kelishmasdan yig‘ilishlarga chaqirish taqiqlanganini ma’lum qildi.
