Yashnoboddagi “Elbek” bog‘i obodonlashtirilib, ichida O‘zbekiston-Turkiya do‘stligi xiyoboni barpo etiladi
24-oktyabr kuni o‘tkazilgan jamoatchilik muhokamasida hududni yangilash va 500 ga yaqin yangi daraxt ekish rejalari ma’lum qilindi.
Loyiha bo‘yicha bog‘dagi piyodalar yo‘laklari yangilanadi, sug‘orish va yoritish tizimlari to‘liq almashtiriladi hamda kuzatuv kameralari o‘rnatiladi. Shuningdek, Turkiya Respublikasi asoschisi Mustafo Kamol Ataturk byusti qo‘yiladigan yangi xiyobon tashkil etilib, dekorativ hovuz hamda maxsus me’moriy konstruksiya barpo etiladi. Hududda bolalar va sport maydonchalari, yugurish yo‘lagi hamda it sayr qildirish zonasini ajratish ko‘zda tutilgan.
Hozirda bog‘da 5500 dan ortiq daraxt mavjud bo‘lib, dendrologik ekspertiza natijalariga ko‘ra ularning holatiga baho beriladi. Shu bilan birga, sobiq avtomobil yo‘li qisqartirilib, uning o‘rnida 510 metrli piyodalar xiyoboni barpo etiladi va yashil hudud maydoni 3 ming kvadrat metrga kengaytiriladi.
Uchrashuvda mahalliy aholi bog‘ning sokin muhiti, tabiiy landshafti hamda bahorgi binafsha maydonlarini saqlab qolishni so‘radi. Toshkent shahar hokimligi jamoatchilik tomonidan bildirilgan barcha taklif va e’tirozlar loyihani yakuniy shakllantirishda inobatga olinishini bildirdi.
