Aliment to‘lamay yurganlarga nisbatan jazo choralarini kuchaytirish taklif qilindi
Yig‘ilishda so‘nggi paytlarda yoshlarning oilaviy hayotga yetarlicha tayyorgarlik ko‘rmasdan turmush qurayotgani va mas’uliyatsizlik sababli ajrimlar soni ortib borayotgani ta’kidlandi.
Partiya vakillari birinchi navbatda ajralishlar soni va ularning kelib chiqish sabablarini chuqur o‘rganish g‘oyasini ilgari surmoqda. Shu tahlillar asosida mahalla faollari, nuroniylar hamda xotin-qizlar tuzilmalari hamkorlikda muammoli oilalar bilan manzilli ishlash tizimini yo‘lga qo‘yishi lozimligi ko‘rsatib o‘tildi.
Tadbirlar davomida asosiy e’tibor aliment to‘lashdan qochib yurgan shaxslarga qaratilib, ularga nisbatan jazo muqarrarligini ta’minlash va javobgarlikni kuchaytirish bo‘yicha aniq takliflar shakllantirildi. Ishtirokchilarning ta’kidlashicha, oilani saqlab qolish va farzandlar oldidagi burchlarni bajarish har bir fuqaro uchun eng birinchi tartibdagi mas’uliyat bo‘lishi shart.
