Shahrisabz ko‘chasida yangi avtobus yo‘lagi ochilib, Sergeli va Yunusobod o‘rtasida uzluksiz jamoat transporti yo‘li shakllantirilmoqda
Yo‘l harakatini tashkil etish markazining ma’lum qilishicha, ushbu ajratilgan yo‘lak Amir Temur shohko‘chasi kesishmasidan Mahtumquli ko‘chasi kesishmasigacha, ya’ni Sharqshunoslik universitetidan 6-sonli tug‘uruqxona majmuasigacha uzaygan.
Yangi qismning qo‘shilishi evaziga Shota Rustaveli va Shahrisabz ko‘chalari bo‘ylab tashkil etilgan uzluksiz BRT yo‘lagining umumiy masofasi deyarli 8 kilometrga yetdi. Markaziy qismda ajratilgan bu kabi maxsus chiziqlar jamoat transportining umumiy avtomobillar tirbandligida qolib ketishining oldini oladi.
Natijada avtobuslarning qatnov oralig‘i qisqarishi, harakat muntazamligi ta’minlanishi hamda yo‘lovchilar manzilga yetib borish vaqtini aniq rejalashtirishi uchun imkoniyat yaratiladi.
Loyihaning yakuniy maqsadi poytaxtning Sergeli va Yunusobod tumanlarini o‘zaro bog‘laydigan yagona hamda tezkor transport yo‘lagini bosqichma-bosqich barpo etishdan iborat.
