O‘zbekistonlik olima Butunjahon fanlar akademiyasi vitse-prezidenti etib saylandi
U tashkilotning o‘tgan davrdagi butun tarixi davomida uning rahbariyatidan joy olgan O‘zbekiston hamda Markaziy Osiyo mintaqasining ilk vakiliga aylandi.
Nobel mukofoti laureati Abdus Salam tashabbusi bilan 1983-yilda tashkil etilgan ushbu akademiya rivojlanayotgan davlatlarda ilm-fanni qo‘llab-quvvatlash bilan shug‘ullanadi. Bosh qarorgohi Italiyaning Triest shahrida joylashgan va YuNESKO tuzilmasiga kiruvchi mazkur nufuzli tashkilot dunyoning 112 mamlakatidan yetakchi olimlarni o‘zida jamlagan.
Ovoz berish natijalariga ko‘ra saylangan Shahlo Turdiqulova 2027-yil 1-yanvardan e’tiboran o‘z vazifasini bajarishga kirishadi. U olti nafar vitse-prezidentdan biri sifatida akademiyaning strategik yo‘nalishlarini belgilash, xalqaro ilmiy hamkorlikni rivojlantirish hamda yosh tadqiqotchilarni qo‘llab-quvvatlash jarayonlarida bevosita qatnashadi.
Taniqli biolog va genetik olima Shahlo Turdiqulova ilgari Ilg‘or texnologiyalar markaziga rahbarlik qilgan hamda AQShning Kaliforniya (UCLA) va Buyuk Britaniyaning Oksford universitetlarida tahsil olgan. Uning rahbarligida mamlakatda koronavirusni aniqlovchi birinchi PZR-test tizimi hamda O‘zbekiston–Xitoy hamkorligidagi ZF-UZ-VAC 2001 vaksinasi yaratilgan edi.
