Toshkentda o‘quvchiga majburan jism yuttirilgani bo‘yicha Bolalar ombudsmani tekshiruv boshladi
Avvalroq Toshkent shahri Yashnobod tumanidagi 151-maktabda o‘quvchiga magnitli bilaguzuk majburan yuttirilgani haqida xabar bergan edik. Bolalar ombudsmani holatni nazoratga olib, o‘rganayotganini ma’lum qildi.
Aniqlandiki, 2-sentyabr kuni Yashnobod tumanidagi maktabning 3-sinf o‘quvchisi T.M.ga yuqori sinf o‘quvchilari tahdid qilgan. Ular bolaning qarshiligiga qaramay, og‘ziga kuch bilan noma’lum jism solgan va u ushbu jismni yutib yuborgan.
5-sentyabr kuni bolaning sog‘lig‘i yomonlashib, qorin qismidagi kuchli og‘riq bilan shifoxonaga yotqizilgan. Shifokorlar tekshiruvida uning ichki organlarida yot jism borligi aniqlanib, shoshilinch operatsiya orqali olib tashlangan.
Bolalar ombudsmanining bildirishicha, hozir bolaning ahvoli qoniqarli, unga zarur tibbiy muolajalar ko‘rsatilmoqda.
Holat yuzasidan tuman IIB tomonidan tergovga qadar tekshiruv olib borilmoqda. Shuningdek, Bolalar ombudsmani kotibiyati xodimlari vaziyatni joyiga chiqqan holda o‘rganmoqda.
Ombudsman bolaning buzilgan huquqlarini tiklash va ta’lim muassasalarida bolalar xavfsizligini ta’minlash masalalari bo‘yicha kuzatuvni davom ettirishini bildirdi. O‘rganish yuzasidan qo‘shimcha axborot berilishi ma’lum qilindi.
