O‘zbekiston va Koreya Seulda 12 milliard dollarlik yirik loyihalar paketini tayyorladi
Seulda o‘tgan muloqotlar davomida savdo, investitsiya, yuqori texnologiyalar hamda xavfsizlik yo‘nalishlaridagi aloqalarni kengaytirish diqqat markazida bo‘ldi. Tashrif yakunlari bo‘yicha umumiy qiymati qariyb 12 milliard dollarlik istiqbolli loyihalar to‘plami shakllantirildi va Koreya Eksimbanki bilan hamkorlik dasturi qabul qilindi. Tomonlar Koreya texnologiyalari va O‘zbekiston resurslariga tayanuvchi innovatsion alyans tuzish, shuningdek, harbiy-texnik hamkorlik hamda kiberxavfsizlik yo‘nalishlarini rivojlantirishga kelishib olgan.
Muzokaralarda kadrlar tayyorlash, ta’lim hamda hududlararo aloqalarga alohida e’tibor qaratildi. Ikki mamlakat o‘rtasida o‘tkazilgan ilk Hududlararo forum yuqori baholanib, navbatdagi anjumanni Samarqandda o‘tkazishga qaror qilindi. Bugungi kunda respublikada Koreya universitetlarining 4 ta filiali hamda KOICA ko‘magida 5 ta kasb-hunarga o‘qitish markazi muvaffaqiyatli faoliyat yuritayotgani va ushbu tajriba yanada kengaytirilishi ta’kidlandi.
Shuningdek, madaniy-gumanitar rishtalarni jadal rivojlantirish va ikki xalq o‘rtasidagi do‘stlikni mustahkamlash maqsadida 2027-yil O‘zbekiston va Koreyada “Madaniyat va o‘zaro almashinuvlar yili” deb e’lon qilindi. Davlat rahbarlari mintaqaviy va xalqaro masalalar yuzasidan ham qarashlar bir xil ekanini tasdiqladilar.
Imzolangan va almashinolgan salmoqli hujjatlar to‘plami ikki mamlakat o‘rtasidagi savdo-iqtisodiy, investitsiyaviy va gumanitar aloqalarni yangi bosqichga olib chiqishni ko‘zda tutadi. Hujjatlar qatorida transport, aviatsiya hamda qishloq xo‘jaligi sohalarida amaliy sheriklikni chuqurlashtirishga oid kelishuvlar o‘rin olgan.
Shuningdek, tomonlar zamonaviy yo‘nalishlar – sun’iy intellekt texnologiyalari, atrof-muhitni muhofaza qilish, iqlim o‘zgarishiga qarshi birgalikda kurashish hamda intellektual mulkni himoya qilish bo‘yicha hamkorlikni huquqiy jihatdan mustahkamladilar. Texnik ko‘mak ko‘rsatish va arxiv ishini tartibga solish bo‘yicha ham alohida bitimlar qabul qilindi.
Ijtimoiy-gumanitar sohalarga alohida e’tibor qaratilib, oliy, maktab va maktabgacha ta’lim tizimlarini takomillashtirish, tibbiy mahsulotlarni tartibga solish hamda turizm oqimini oshirish bo‘yicha muhim kelishuvlarga erishilgan.
