Ispaniyada tezyurar poyezdlar to‘qnashuvi oqibatida 68 kishi halok bo‘ldi. Mamlakatda 3 kunlik motam e’lon qilindi
Ispaniyaning Andalusiya mintaqasida ikkita tezyurar poyezd to‘qnashdi. Rasmiylar ma’lumotlarga ko‘ra, hodisa oqibatida kamida 68 kishi halok bo‘lgan. Ispaniya Bosh vaziri Pedro Sanches mamlakatda uch kunlik motam e’lon qildi.
O‘zbekiston prezidenti Shavkat Mirziyoyev poyezdlarning to‘qnashishi oqibatida ko‘plab insonlar halok bo‘lgani va og‘ir jarohat olgani munosabati bilan Ispaniya qiroli Filipp VI ga ta’ziya yo‘lladi.
Renfe va Iryo kompaniyalariga tegishli tezyurar poyezdlar to‘qnashuvi 28-oktabr kuni soat 9:00 dan biroz o‘tib, Madriddan taxminan 140 km janubda joylashgan Urda shahri yaqinida sodir bo‘lgan.
Madriddan mamlakat janubiga yo‘l olgan Renfe kompaniyasining tezyurar poyezdi undan oldinroqda to‘xtab turgan Iryo kompaniyasining poyezdiga borib urilgan. Zarba natijasida Iryo poyezdining uchta vagoni ag‘darilib, temiryo‘ldan chiqib ketgan, Renfe vagonlarining yarmi izdan chiqib, yonboshga ag‘darilgan.
Ispaniya Transport vazirining so‘zlariga ko‘ra, Iryo poyezdi to‘xtaganidan keyin yoqilgan qizil svetofor signaliga qaramay, Renfe poyezdiga to‘liq tezlikda harakatlanishga ruxsat berilgan. Nega Renfe poyezdiga harakatlanishga ruxsat berilgani hozircha noma’lum.
28-oktabr kechqurun Kastiliya-La-Mancha mintaqasi hukumati halok bo‘lganlarning tasdiqlangan soni 68 kishiga yetganini ma’lum qildi. 77 kishi kasalxonalarga yetkazildi, ulardan 15 nafari og‘ir ahvolda.
Ispaniya Bosh vaziri Pedro Sanches halokat joyiga yetib bordi.
“Bugun Ispaniya motam tutmoqda, butun Ispaniya motam tutmoqda. Biz halok bo‘lganlarning yaqinlariga va hozircha kasalxonada qolayotgan jabrlanuvchilarga to‘la hamjihatligimiz va hamdardligimizni bildiramiz, jarohatlanganlar tezroq tuzalishini tilaymiz», – Ispaniya Bosh vaziri.
Transport vaziri Puente qo‘shimcha qilishicha, dispetcherlik markazi poyezdlarga hech qanday tezlik cheklovisiz harakatni qayta boshlashga ruxsat bergan.
Vazirning so‘zlariga ko‘ra, bu qaror “tushunarsiz holatda” qabul qilingan.
“Harakatga ruxsat olgach, Renfe poyezdi yo‘lni davom ettirgan va 25 kilometr yurgach, Iryo poyezdiga duch kelgan. Poyezd bu paytda soatiga 200 kilometr tezlikda bo‘lgan va shu tezlik bilan oldingi poyezdga borib urilgan”, deydi Puente.
Uning qo‘shimcha qilishicha, dispetcherlik markazida xatoni aniqlash uchun “vaqt yetarlicha bo‘lgan, ammo ular bunga e’tibor bermagan”.
Ushbu voqea mamlakatda 2013-yildan buyon sodir bo‘lgan eng og‘ir temir yo‘l halokati bo‘ldi. O‘shanda Ispaniyaning shimoli-g‘arbidagi Santyago-de-Kompostela mintaqasida tezyurar poyezd burilishda halokatga uchrab, 80 kishi halok bo‘lgan edi.
Shu kuni Prezident Shavkat Mirziyoyev Ispaniyaning Toledo provinsiyasida poyezdlar to‘qnashuvi oqibatida ko‘plab insonlar halok bo‘lgani va jarohat olgani munosabati bilan Ispaniya Qiroli Felipe VI nomiga hamdardlik yo‘lladi.
Davlat rahbari Ispaniya xalqiga, halok bo‘lganlarning oila a’zolari va yaqinlariga ta’ziya bildirib, jarohatlanganlar tezroq sog‘ayib ketishini tiladi.
