Toshkentdagi avtohalokatda Lacetti daraxtga urilib, ikkiga bo‘linib ketdi
Toshkent shahrining Chilonzor tumanida 28 oktyabr kuni Lacetti haydovchisi rul boshqaruvini yo‘qotib, daraxtga borib urildi. Bu haqda Toshkent shahar Ichki ishlar bosh boshqarmasi Yo‘l harakati xavfsizligi boshqarmasi xabar berdi.
Ma’lumotlarga ko‘ra, yo‘l-transport hodisasi tunggi soat 02:30 larda Bunyodkor ko‘chasi, Oliy Majlis binosi qarshisida ro‘y bergan.
21 yoshli haydovchi R.A. Lacetti’ni boshqarayotib, rul boshqaruvini yo‘qotgan va yo‘l chetidagi daraxtga urilgan. Ijtimoiy tarmoqlarda tarqalgan videolarda Lacetti avtomobilining ikkiga bo‘linib ketgani aks etgan. Haydovchiga birinchi tibbiy yordam ko‘rsatish uchun u shifoxonaga olib ketilgan.
Hozirda holat yuzasidan Toshkent shahar IIBB YHXB mas’ul xodimlari tomonidan surishtiruv ishlari olib borilmoqda.
