Shahrisabzda avtomobil daraxtga urilishi qoibatida haydovchi shifoxonada vafot etdi
Shahrisabz tumanida sodir bo‘lgan yo‘l-transport hodisasi oqibatida 2006-yilda tug‘ilgan haydovchi vafot etdi. Bu haqda Qashqadaryo viloyati IIB JXX YHXB axborot xizmati xabar berdi.
Ma’lum qilinishicha, hodisa 26-oktabr kuni soat 23:30 atrofida Shahrisabz tumanidagi Katta Novqat mahallasi hududidan o‘tgan mahalliy ahamiyatdagi avtomobil yo‘lida yuz bergan. 2006-yilda tug‘ilgan M.X. “VAZ-2105” rusumli avtomobilni boshqarib ketayotib, rul boshqaruvini yo‘qotgan. Shundan so‘ng mashina yo‘l chetidagi daraxtga borib urilgan.
To‘qnashuvda tan jarohatlari olgan haydovchi shifoxonaga olib borilgan, biroq ko‘rsatilgan tibbiy yordamga qaramay vafot etgan.
Holat yuzasidan Shahrisabz tumani IIB Tergov bo‘linmasi tomonidan O‘zbekiston Respublikasi Jinoyat kodeksining 266-moddasi 2-qismi bilan jinoyat ishi qo‘zg‘atilgan. Hozirda tergov harakatlari davom etmoqda.
Qashqadaryo viloyati IIB JXX YHXB yo‘l harakati qatnashchilarini qoidalarga rioya qilishga chaqirib, marhumning yaqinlariga hamdardlik bildirgan.
