Misr O‘zbekiston fuqarolari uchun kirish qoidalarini qat’iylashtirishni 2027-yil bahoriga qadar kechiktirdi
Ikki mamlakat rasmiylari o‘rtasida o‘tkazilgan muzokaralar natijasida vizaviy talablarni kuchaytirish bo‘yicha avvalroq qabul qilingan qaror ijrosini ortga surishga erishildi.
Tashqi ishlar vazirligi hamda Qohiradagi elchixona vakillari Misr tomoni bilan to‘g‘ridan-to‘g‘ri muloqot olib borib, kirish tartibini qayta ko‘rib chiqishga kelishib olgan. Shu tariqa yangi talablar rasman kuchga kirgunga qadar o‘zbekistonliklar ushbu mamlakatga amaldagi qoidalar bo‘yicha borishda davom etadi.
TIV xorijiy hamkorlar bilan fuqarolar uchun vizasiz rejimlarni kengaytirish va safar shartlarini soddalashtirish bo‘yicha ishlar davom etayotganini bildirdi. Shu bilan birga, xorijga chiquvchi shaxslarga borilayotgan mamlakat qonunlari, viza-migratsiya talablari hamda mahalliy tartib-qoidalarga qat’iy rioya qilish eslatib o‘tildi.
