O‘zbekistondagi do‘konlarda soxta aksiyalar va berilmagan yutuqlar bo‘yicha o‘nlab qoidabuzarliklar aniqlandi
Tahlil qilingan 116 ta aksiya davomida e’lon qilingan chegirmalar amalda noto‘g‘ri qo‘llanilgani, shartlar to‘liq tushuntirilmagani hamda g‘oliblarga va’da qilingan qimmatbaho sovrinlar berilmagani ma’lum bo‘ldi.
Jumladan, Namanganda “Chevrolet Cobalt” avtomobilini yutib olgan fuqaroga raqam adashgani bahonasi bilan mashinasi berilmay, boshqa shaxsga topshirib yuborilgan va faqat qo‘mita aralashuvidan so‘ng yutuq haqiqiy g‘olibga qaytarilgan. Andijonda esa “Water Life Mineral” MChJ g‘oliblarga 60 million so‘mlik sovrinlarni topshirmagani uchun korxonaga nisbatan ish qo‘zg‘atildi. Shuningdek, Samarqand va Qashqadaryoda avtosalon hamda “IDEA” do‘konlar zanjiri xaridorlarni chalg‘ituvchi aksiya shartlarini qo‘llagani aniqlandi.
Tekshiruvlar natijasida aniqlangan kamchiliklarning aksariyati joyida bartaraf etilib, to‘rtta subyektga nisbatan ish qo‘zg‘atildi va iste’molchilar foydasiga qariyb 250 million so‘m qayta hisob-kitob qilib berildi. Qo‘mita bunday soxta chegirmalarga chek qo‘yish maqsadida narxlar tarixini raqamlashtirish va mahsulotning asl narxini QR-kod orqali tekshirish tizimini joriy etishni taklif qilmoqda.
