“Biz O‘zbekiston bilan munosabatlarimizga katta ahamiyat beramiz” – Eron TIV
Eron Tashqi ishlar vazirligining rasmiy vakili Ismoil Baqoiy matbuot anjumanida O‘zbekiston TIV tomonidan bildirilgan norozilik notasi hamda diplomatik vakolatxonalarning Samarqand va Registon bo‘yicha e’lon qilgan postlariga munosabat bildirdi.
Baqoiyning ta’kidlashicha, Eron va O‘zbekiston o‘rtasidagi aloqalar uzoq tarixga ega.
“Eron va O‘zbekistonni bir-biriga bog‘lab turuvchi rishtalar bugun yoki kecha paydo bo‘lmagan. Biz O‘zbekiston bilan munosabatlarga katta ahamiyat beramiz. Aminmizki, qo‘shni mamlakatlarning turli hududlarida va undan ham kengroq makonda mavjud bo‘lgan mushtarak merosimiz xalqlar o‘rtasidagi do‘stona aloqalarni davom ettirish va mustahkamlash uchun asos bo‘lib xizmat qiladi”, degan Eron TIV vakili.
Shuningdek, Baqoiy Eron elchixonalari tomonidan e’lon qilingan va O‘zbekiston tomonining e’tiroziga sabab bo‘lgan ijtimoiy tarmoqdagi postlarga ham to‘xtalgan.
“Ayrim elchixonalarimizdagi do‘stlarimiz ushbu postlarini AQSH tomon yo‘llab, e’lon qilishgan edi”, deya qo‘shimcha qilgan u.
Marko Rubio tashrifi va Eron elchixonalar postlari
AQSH Davlat kotibi (Tashqi ishlar vaziri) Marko Rubio 18-20 oktabr kunlari O‘zbekistonga tashrif buyurdi. Bu yerda AQSH va Markaziy Osiyo tashqi ishlar vazirlari ishtirokida C5+1 formatida uchrashuvlar bo‘lib o‘tdi.
AQSH rasmiysi O‘zbekistonga tashrifi doirasida Samarqanddagi Registon ansambliga ham borib, o‘zbek xalqining tarixiy obidalari, an’analari bilan tanishdi. Shu yerda OAV bilan uchrashuv ham o‘tkazildi.
Shundan so‘ng, Rubioning Samarqanddagi Registon ansamblida tushgan suratlari Eron Islom Respublikasining elchixonalari sahifalarida paydo bo‘ldi. Ushbu suratlar ostiga Samarqand va Registon forsi sivilizatsiyasining bir qismi ekani, Samarqanddagi me’morchilik obidalar fors madaniyati merosi ekani haqidagi postlar yozildi.
Bu ijtimoiy tarmoqlarda keskin muhokamalarga sabab bo‘ldi.
23-oktyabr kuni O‘zbekiston Tashqi ishlar vazirligi Eron elchisi Muhammad Ali Iskandariyni chaqirtirib, unga O‘zbekistonning qat’iy e’tirozini ifodalovchi norozilik notasini topshirdi.
Bunga Eronning xorijdagi qator diplomatik vakolatxonalari tomonidan Samarqandning tarixiy-madaniy merosini biryoqlama va siyosiy maqsadlarda talqin qiluvchi materiallar e’lon qilinishi sabab bo‘lgani qayd etildi.
Eron tomoniga tegishli postlarni o‘chirib tashlash va kelgusida bunday holatlar takrorlanishiga yo‘l qo‘ymaslik talabi qo‘yildi. Shundan so‘ng, Eron elchixonalarining sahifalaridan Samarqand haqidagi bahsli postlar olib tashlandi.
