O‘zbekistondagi ba’zi aeroportlar temiryo‘l vokzallari bilan bog‘lanadi
Normativ-huquqiy hujjatlar loyihalari muhokamasi portalida “Temir yo‘l, havo va avtomobil transportida mahalliy yo‘lovchi tashuvlarini o‘zaro uyg‘unlikda kompleks rivojlantirish bo‘yicha 2030-yilgacha mo‘ljallangan strategiyasini tasdiqlash to‘g‘risida”gi Prezident qarori loyihasi muhokamaga qo‘yildi.
Hujjatga ko‘ra, yirik shaharlarda temiryo‘l vokzallari va aeroportlarni o‘zaro bog‘lovchi temiryo‘l tarmoqlarini bosqichma-bosqich barpo etish, ularning sonini 3 taga yetkazish rejalashtirilmoqda. Xususan, ushbu loyiha doirasida quyidagi obyektlar o‘rtasida elektrlashtirilgan temir yo‘l liniyalarini qurish va bog‘lashni tashkil etish nazarda tutilgan:
“Toshkent-Shimoliy” temir yo‘l vokzali hamda Yangi Toshkent aeroporti;
Urganch temir yo‘l vokzali hamda Urganch xalqaro aeroporti;
Buxoro temir yo‘l vokzali hamda Yangi Buxoro aeroporti.
Bundan tashqari, strategiya doirasida Toshkent, Samarqand, Buxoro, Urganch, Nukus va Farg‘ona shaharlarida 6 ta yirik transport uzelini (transport hub) tashkil etish hamda aeroport, temiryo‘l vokzali va avtovokzallarni o‘zaro bog‘lovchi kamida 20 ta yangi jamoat transporti yo‘nalishlarini yo‘lga qo‘yish ko‘zda tutilgan.
Shuningdek, 2028-yil 1-yanvardan boshlab temiryo‘l, havo va avtobus qatnovlarini qamrab oluvchi “Bir yo‘l” yagona milliy raqamli transport platformasini ishga tushirish, yagona elektron chipta tizimini joriy etish hamda yo‘lovchilarga “eshikdan eshikkacha” tamoyili bo‘yicha safarni rejalashtirish imkoniyatini yaratish maqsad qilingan.
