Qashqadaryoda ham ekopolitsiya xodimlari huquqbuzarlar hujumiga uchradi
Qashqadaryo viloyatida kecha, 11-sentabr kuni Ekologiya va iqlim o‘zgarishi bosh boshqarmasining G‘uzor tumani bo‘limi boshlig‘i Bahrom Toshpo‘latov huquqbuzarlar hujumiga uchrab, hushsiz holatda viloyat shoshilinch tez tibbiy yordam ilmiy markaziga olib kelindi. Bu haqda Ekologiya qo‘mitasi xabar qildi.
Dastlabki ma’lumotlarga ko‘ra, Bahrom Toshpo‘latov G‘uzor tumani Qovchin MFY hududidan oqib o‘tuvchi Qashqadaryo daryosida noqonuniy qum-shag‘al qazib olish holatlarini aniqlash bo‘yicha reyd tadbirida huquqbuzarlar hujumiga uchragan.
Uni shu hududda fuqarolardan biri hushsiz holatda topib, shifoxonaga olib kelgan. Hozirda tibbiyot muassasasida unga zarur tibbiy yordam ko‘rsatilmoqda.
Shuningdek, 6-sentabrdan 7-sentabrga o‘tar kechasi G‘uzor tumani Qovchin MFYning Arab qishlog‘i hududida ekopolitsiya inspektorlari tomonidan ekologik nazorat reydi o‘tkazilgan.
Reyd davomida Qashqadaryo daryosining muhofaza etiladigan hududida noqonuniy qum-shag‘al qazib olinayotgani aniqlangan. Ekopolitsiya xodimlari qonunbuzarlikni to‘xtatib, texnikani jarima maydoniga olib ketayotgan vaqtida huquqbuzarlar ularga faol qarshilik ko‘rsatgan.
Xususan, davlat raqamisiz qora rangli “KIA K5”, shuningdek, davlat raqami 70 K 413 AA bo‘lgan “Lasetti” va “Cobalt” avtomobillarida kelgan shaxslar yo‘lni to‘sib, inspektorlardan biriga tan jarohati yetkazgan. Shuningdek, jarima maydoniga olib ketilayotgan texnika vositasini olib qochgan.
Mazkur ikki holat yuzasidan G‘uzor tuman prokuraturasi va IIBning tezkor-tergov guruhi tomonidan tergovga qadar tekshiruv olib borilmoqda.
