Rasmiy Toshkent Saudiya Arabistoniga qilingan raketa va dron hujumlarini keskin qoraladi
Tashqi siyosat mahkamasi tinch aholi vakillariga, fuqarolik hamda energetika infratuzilmasi obyektlariga nisbatan kuch ishlatish holatlarini keskin qoralashini bildirdi. Bayonotda ta’kidlanishicha, bunday harakatlar mintaqa davlatlari xavfsizligiga bevosita raxna soladi hamda xalqaro kema qatnovi barqarorligiga jiddiy tahdid tug‘diradi.
Rasmiy Toshkent xalqaro huquq normalariga, xususan, barcha davlatlarning suvereniteti, mustaqilligi hamda hududiy daxlsizligi tamoyillariga qat’iy rioya etilishi shartligini eslatib o‘tdi. Mintaqada yuzaga kelayotgan har qanday ziddiyat va kelishmovchiliklar faqatgina siyosiy-diplomatik muloqot hamda o‘zaro hurmat yo‘li bilan hal etilishi lozimligi ko‘rsatib o‘tilgan.
O‘zbekiston Birlashgan Millatlar Tashkiloti hamda mintaqaviy hamkorlarning Yaqin Sharqdagi harbiy eskalatsiyani jilovlash, nizo ko‘lamining kengayishiga yo‘l qo‘ymaslik va barqaror tinchlikni ta’minlashga qaratilgan harakatlarini to‘liq qo‘llab-quvvatlashini ma’lum qildi.
Kecha, 12-sentyabr kuni Saudiya Arabistonidagi “Sharq-G‘arb” magistral neft quvuriga dronlar orqali zarba berildi. Reuters agentligi ma’lumotlariga ko‘ra, ushbu infratuzilma obyekti dunyo neft ta’minotining 4-5 foiz qismini tranzit qilish imkoniyatiga ega.
Hozircha hech bir harbiy guruh ushbu hujum uchun javobgarlikni rasman o‘z zimmasiga olgani yo‘q. Biroq AQSH prezidenti Donald Tramp voqea ortida katta ehtimol bilan Eron turganini ta’kidladi. Rasmiy Tehron hozircha Vashington va Ar-Riyod tomonidan bildirilgan ushbu ayblovlarga hech qanday munosabat bildirmadi.
Saudiya Arabistoni rasmiylarining ma’lum qilishicha, uchuvchisiz apparatlar Iroq hududidan uchirib kelingan. Ta’kidlanishicha, ushbu hududlar Tehron tomonidan qo‘llab-quvvatlanuvchi qurolli guruhlar nazoratida bo‘lib, Iroq markaziy hukumati ularning harakatlarini cheklashda qiyinchilikka uchramoqda.
