O‘zbekistonda tug‘ilishlar soni kamaydi, ammo 40 yoshdan oshgan onalar ulushi ortmoqda
2026-yilning yanvar-iyun oylarida respublikada 373 389 ta tug‘ilish holati qayd etildi. Bu ko‘rsatkich o‘tgan yilning mos davriga nisbatan 32 119 taga yoki 7,9 foizga kamdir. Mamlakatda umumiy demografik pasayish fonida 2024-yilning birinchi yarmida 419 856 ta, 2025-yilning mos davrida esa 405 508 ta chaqaloq dunyoga kelgani kuzatilgan edi.
Yangi statistikaga ko‘ra, jami tug‘ilgan chaqaloqlarning 39,5 foizi 25 yoshgacha bo‘lgan, 58,8 foizi esa 25 yoshdan 39 yoshgacha bo‘lgan ayollar hissasiga to‘g‘ri kelgan. Shu bilan birga, 40 yosh va undan katta yoshdagi onalardan 6 446 nafar farzand dunyoga kelgan bo‘lib, bu umumiy ko‘rsatkichning 1,7 foizini tashkil etdi. Hatto sakkizta holatda onalarning yoshi 50 va undan yuqori ekani qayd etilgan.
Tahlillar umumiy tug‘ilish pasayganiga qaramay, yoshi katta onalar ulushi barqaror ravishda oshib borayotganini ko‘rsatmoqda. Xususan, 40 yoshdan oshgan ayollar hissasiga to‘g‘ri kelgan tug‘ilishlar ulushi 2024-yilning birinchi yarmidagi 1,3 foizdan 2026-yilning mos davrida 1,7 foizgacha ko‘tarildi. Birgina yillik hisobda ushbu guruhdagi ayollarda tug‘ilish soni 8,7 foizlik o‘sishni namoyon etgan.
