Toshkentda havo ifloslanishi yana 10 kun davom etishi mumkin
Toshkent shahrida atmosfera inversiyasi yana 10 kun davom etishi mumkin. Bu esa havo ifloslanishining kuchayishiga olib keladi, deya ogohlantirdi O‘zgidromet.
“Chang va ifloslantiruvchi moddalar havoga doimiy ravishda chiqib turibdi. Agar shamol esmasa, ularning tarqalib ketishi qiyinlashadi. Yomg‘ir yog‘sa ham havodagi chang zarrachalarini yuvib tushiradi. Shamol va yomg‘ir bo‘lmagan davrda ifloslantiruvchi moddalar havoda to‘planib boradi. Atmosfera inversiyasi esa ularning yuqoriga tarqalishini yanada qiyinlashtiradi”, – deyiladi xabarda.
O‘zgidromet ta’kidlashicha, havo sifatini yaxshilash uchun bir qator chora-tadbirlar amalga oshirilmoqda. Shaharda avtomobil yo‘llariga suv sepilishi, issiqxonalarda filtrlar o‘rnatilishi, ko‘kalamzorlashtirish ishlari, qurilish maydonlarida chang ko‘tarilmasligini nazorat qilish va boshqalar shular jumlasidan.
Shu bilan birga, atrof-muhitni ifloslantirayotgan issiqxonalar va sanoat korxonalariga reydlar uyushtirilmoqda.
Gidrometeorologiya ilmiy-tadqiqot instituti ma’lumotlariga ko‘ra, 20−27-oktabr kunlari Toshkent va Markaziy Osiyoning boshqa shaharlarida havo sifati yomonlashuvining asosiy sababi antisiklon, shamolning susayishi va harorat inversiyasi bo‘ldi. Ushbu sharoitlar tabiiy chang hamda transport, sanoat va energetika chiqindilarining to‘planishiga olib keldi.
