Tadbirkorlardan noqonuniy 5,5 milliard so‘m yig‘gan “Hududiy elektr tarmoqlari” javobgarlikka tortilmoqda
Biznes-ombudsman taqdim etgan ma’lumotlar asosida o‘tkazilgan tekshiruvlar davomida respublika bo‘yicha 965 ta holatda tadbirkorlik subyektlaridan asossiz ravishda daromad olingani alomatlari fosh etildi. Amaldagi qonunchilik hamda Elektr energiyasidan foydalanish qoidalariga kiritilgan o‘zgartirishlarga ko‘ra, qarzdorlik bartaraf etilgach, iste’molchilarni qayta tarmoqqa ulash uchun har qanday qo‘shimcha to‘lov va jarimalar undirish to‘liq bekor qilingan edi.
O‘rganishlar shuni ko‘rsatdiki, energetika korxonalari ushbu tartibga rioya etmasdan, 2025-yilning 23-avgustidan 2026-yilning fevral oyiga qadar bo‘lgan davrda tadbirkorlardan qayta ulash xizmati uchun noqonuniy ravishda mablag‘ yig‘ib kelgan. Mazkur davr mobaynida asossiz undirilgan mablag‘larning umumiy miqdori 5,5 milliard so‘mni tashkil etgan.
Hozirgi vaqtda aniqlangan holatlar yuzasidan qo‘zg‘atilgan ish doirasida manfaatdor davlat organlari vakillari ishtirokida surishtiruv jarayonlari olib borilmoqda. Tekshiruvlar yakuniga ko‘ra, “Hududiy elektr tarmoqlari” AJ tizimidagi mas’ullarga nisbatan tegishli huquqiy choralar ko‘rilishi hamda noqonuniy undirilgan mablag‘larni tadbirkorlarga qaytarish masalasi ko‘rib chiqiladi.
