Nijnekamskdagi fojiada og‘ir yaralangan so‘nggi o‘zbekistonlik Qozondan Toshkentga olib kelindi
Avgust oyida sodir bo‘lgan fojia oqibatida jiddiy jabrlangan 2001-yilda tug‘ilgan fuqaro dastlab Nijnekamsk shahridagi Markaziy shifoxonaning jonlantirish bo‘limida qolayotgan edi. Keyinchalik Tatariston hokimlik organlari yordamida u vertolyotda Qozon shahridagi ixtisoslashtirilgan shifoxonaga ko‘chirilgan va u yerda shifokorlar tomonidan ikki marotaba murakkab jarrohlik amaliyoti o‘tkazilgan.
O‘zbekistonning Qozondagi Bosh konsulxonasi hamda Migratsiya agentligi vakillari bemorni tibbiy evakuatsiya qilish uchun zaruriy reabilitatsiya tadbirlarini va huquqiy jarayonlarni muvofiqlashtirdi. Qiyin vaziyatda qolgan vatandoshimizga barcha zarur konsullik va amaliy yordamlar ko‘rsatilib, rasmiylashtirish ishlari to‘liq yakuniga yetkazilgan.
Bosh konsulxona, Migratsiya agentligi hamda “Uzbekistan Airways” aviakompaniyasining birgalikdagi sa’y-harakatlari natijasida so‘nggi jabrlangan fuqaro “Qozon – Toshkent” reysi orqali tibbiy nazorat ostida O‘zbekistonga keltirildi. Hozirda fuqaro davolanish muolajalarini respublikamizda davom ettirishi belgilangan.
Avvalroq Tataristondagi dronlar hujumida halok bo‘lgan o‘zbekistonliklar soni 8 nafarga yetgan edi. Hukumat komissiyasi tuzilgan.
