O‘zbekistonda murojaatlar bilan loqayd ishlagan 151 nafar amaldor lavozimidan olib tashlandi

Qayd etilishicha, 2026-yilning yanvar–avgust oylarida Prezident Xalq qabulxonalari tomonidan davlat organlari va tashkilotlariga murojaatlar bilan ishlashda yo‘l qo‘yilgan kamchiliklar yuzasidan ta’sir choralari ko‘rish bo‘yicha jami 5 486 ta hujjat kiritilgan.

Shundan 1 386 tasi taqdimnoma, 642 tasi talabnoma, 495 tasi axborot va 2 963 tasi ko‘rsatmadan iborat bo‘lgan.

Eng ko‘p taqdimnomalar Kambag‘allikni qisqartirish va bandlik vazirligi tizimiga – 233 ta, Mahallalar uyushmasi tizimiga – 218 ta, Majburiy ijro byurosi tizimiga – 158 ta, Bosh prokuratura tizimiga – 128 ta hamda Ijtimoiy himoya milliy agentligi tizimiga – 86 ta kiritilgan.

Shuningdek, Sog‘liqni saqlash vazirligi tizimiga 80 ta, Oila va xotin-qizlar qo‘mitasiga 54 ta, “Hududiy elektr tarmoqlari” tizimiga 50 ta, Qurilish va uy-joy kommunal xo‘jaligi vazirligi tizimiga esa 48 ta taqdimnoma kiritilgan.

Ko‘rsatmalar eng ko‘p Mahallalar uyushmasi tizimiga – 246 ta, Kambag‘allikni qisqartirish va bandlik vazirligi tizimiga – 212 ta, Sog‘liqni saqlash vazirligi tizimiga – 210 ta hamda Ijtimoiy himoya milliy agentligi tizimiga – 208 ta kiritilgan.

Majburiy ijro byurosi tizimiga 188 ta, elektr ta’minoti korxonalariga 183 ta, “Hududgazta’minot” tizimiga 149 ta, Kadastr agentligi tizimiga 131 ta va tijorat banklari tizimiga 127 ta ko‘rsatma berilgan.

Bundan tashqari, Oila va xotin-qizlar qo‘mitasi tizimiga 123 ta, “O‘zsuvta’minot” tizimiga 117 ta, Soliq qo‘mitasi tizimiga 112 ta hamda Maktabgacha va maktab ta’limi vazirligi tizimiga 100 ta ko‘rsatma kiritilgan.

Talabnomalar esa eng ko‘p mahalliy hokimliklar tizimiga — 62 ta, Sog‘liqni saqlash vazirligiga — 59 ta, Ijtimoiy himoya milliy agentligiga — 47 ta va Mahallalar uyushmasi tizimiga — 44 ta kiritilgan.

Elektr ta’minoti korxonalariga 42 ta, Kambag‘allikni qisqartirish va bandlik vazirligi tizimiga 39 ta, Majburiy ijro byurosi tizimiga 32 ta hamda tijorat banklari tizimiga 31 ta talabnoma yuborilgan.

Ko‘rilgan choralar natijasida 151 nafar shaxs lavozimidan ozod etilgan. Shuningdek, 833 nafar xodimga hayfsan berilgan, 150 nafari ma’muriy javobgarlikka tortilgan, 89 nafar shaxsga jarima qo‘llanilgan.

Bundan tashqari, 8 nafar xodimning lavozimi pasaytirilgan, 3 holatda ma’naviy ziyon uchun kompensatsiya undirilgan, 1 holatda moddiy zarar qoplangan.

Eng ko‘p qo‘llangan ta’sir chorasi esa rasman ogohlantirish bo‘lib, jami 1 335 nafar shaxs ogohlantirilgan. Bu esa murojaatlar bilan ishlashda aniqlangan kamchiliklarning katta qismi intizomiy tartibda bartaraf etishga qaratilganini ko‘rsatadi.

Murojaatlardagi kamchiliklardan kelib chiqib, faqat ta’sir choralari ko‘rish bilan cheklanilmagan. Eng ko‘p murojaatlar tushayotgan qariyb 10 ta tashkilotda yo‘l qo‘yilgan xato va kamchiliklarni bartaraf etish, murojaatlar bilan ishlash sifatini yaxshilash maqsadida amaliy o‘quv seminarlari ham tashkil etilgan.