Litvada juma namozi vaqtida masjid oldida cho‘chqa boshi bilan provokatsiya uyushtirildi
Litvaning Kaunas shahrida qariyb 100 nafar mototsiklchi Kaunas masjidida juma namozi vaqtida masjid yaqinida to‘planib, shovqin ko‘tardi va cho‘chqa boshini namoyish qildi. Holat yuzasidan politsiya tekshiruv boshlagan.
Mahalliy OAV ma’lumotlariga ko‘ra, mototsiklchilar masjid yaqinidagi Ramybės bog‘ida to‘planib, dvigatellarini baland ovozda ishlatgan, musiqa qo‘ygan va “Litva” deya hayqirgan.
Ijtimoiy tarmoqlarda tarqalgan videolarda mototsiklchilardan biri cho‘chqa boshini ko‘tarib, uni namoz o‘qiyotganlar tomonga qaratgani aks etgan. Bu holat mahalliy musulmonlar noroziligiga sabab bo‘lgan.
Voqea joyiga qo‘shimcha politsiya kuchlari jalb qilingan. Shunga qaramay, mototsiklchilar va musulmonlar o‘rtasida jiddiy to‘qnashuv yuz bermagan.
Politsiya dastlab ommaviy tadbirlarni tashkil etish qoidalari buzilishi bo‘yicha ma’muriy ish boshlagan. Shu bilan birga, huquq-tartibot idoralari hodisada bir guruh odamlarga nisbatan adovat qo‘zg‘atish alomatlari mavjud yoki yo‘qligini ham tekshirmoqda.
Mototsiklchilar esa aksiya nima maqsadda tashkil etilganiga aniq izoh bermagan.
