Yevropa Ittifoqi mamlakatlari soat millarini bir soat orqaga surib, qishki vaqtga o‘tdi
“Deutsche Welle” bergan ma’lumotga ko‘ra, ittifoq hududidagi barcha soatlar millari roppa-rosa bir soat orqaga surilgan.
Xususan, Bryussel vaqti bilan tungi soat 03:00 da soatlar 02:00 ga o‘zgartirildi.
Yevropada yozgi va qishki vaqtga o‘tish bo‘yicha yagona qoida 1996-yildan buyon amal qilib kelmoqda. Unga ko‘ra, mart oyining oxirgi yakshanbasida soatlar bir soat oldinga, oktyabr oyining so‘nggi yakshanbasida esa bir soat orqaga suriladi. Aslida 2019-yilda Yevroparlament ushbu amaliyotdan voz kechishni yoqlab ovoz bergan bo‘lsada, YeI a’zolari bu masalada hamon yakdil bir to‘xtamga kela olgani yo‘q.
Hozirda Yevropa Ittifoqi hududida uchta asosiy vaqt zonasi mavjud. Irlandiya va Portugaliya Grinvich vaqti bilan yashasa, Finlandiya hamda Boltiqbo‘yi mamlakatlari kabi 8 ta davlat Sharqiy Yevropa vaqtidan foydalanadi. Germaniya hamda ittifoqning qolgan ko‘plab mamlakatlarida esa Markaziy Yevropa vaqti amal qiladi.
