O‘zbekistonda yetti oyda 227,4 trillion so‘mlik bino qurildi
So‘nggi besh yillik dinamikaga nazar tashlansa, qurilish sohasidagi o‘sish sur’atlari izchil yuqorilab borayotganini ko‘rish mumkin. Xususan, 2022-yildagi 106,4 foizlik ko‘rsatkich joriy yilga kelib 112,9 foizni tashkil etdi. Ish hajmi va pul oqimi bo‘yicha poytaxt Toshkent shahri 76,2 trillion so‘m bilan yaqqol yetakchilik qilayotgan bo‘lsa-da, o‘sish sur’ati bo‘yicha hududlarda kutilmagan yuqori natijalar qayd etildi. Bajarilgan ishlar hajmining eng yuqori o‘sishi Qoraqalpog‘iston Respublikasi (141,9%), Samarqand (138%) va Xorazm (128,5%) viloyatlariga to‘g‘ri keldi.
Bajarilgan umumiy qurilish ishlarining mutlaq ustun qismi – 97,6 foizi nodavlat sektor hissasiga to‘g‘ri keldi, davlat tashkilotlarining ulushi esa bor-yo‘g‘i 2,4 foizni tashkil etdi. Bozordagi asosiy yuklamani kichik korxonalar va mikrofirmalar o‘z zimmasiga olib, jami hajmining 55,5 foizini (126,2 trillion so‘m) bajarishga erishdi. Yirik qurilish kompaniyalari hissasiga 25 foiz (56,9 trillion so‘m), aholi tomonidan shaxsiy kuch va mablag‘lar evaziga bajarilgan bunyodkorlik ishlariga esa 19,5 foiz (44,4 trillion so‘m) ulush to‘g‘ri keldi.
Ayniqsa, yirik pudrat tashkilotlarining faolligi hududlar kesimida keskin oshgani kuzatildi. Yirik subyektlar bajarilgan ishlar hajmini Qoraqalpog‘istonda 5,6 baravarga, Xorazmda 2,9 va Samarqandda 2,3 baravarga ko‘paytirishga erishdi. Yana bir e’tiborli jihati, Samarqandda aholi tomonidan bajarilgan qurilish ishlari 3,6 foizga kamayganiga qaramay, viloyatda umumiy soha hajmi yirik va kichik biznes subyektlarining faolligi evaziga 38 foizlik keskin o‘sishni namoyish etdi. Yo‘nalishlar bo‘yicha esa bino va inshootlar barpo etish umumiy hajmning 68,3 foizini tashkil qildi.
