Sankt-Peterburgda 2027-yildan mehnat migrantlari uchun patent narxi oshiriladi

Sankt-Peterburg Qonunchilik majlisi deputatlari shahar gubernatori tomonidan kiritilgan va xorijiy ishchilar uchun patentlarni rasmiylashtirish hamda uzaytirish to‘lovlarini oshirishni ko‘zda tutuvchi qonun loyihasini uchinchi o‘qishda qabul qildi.
Yangi tartibga muvofiq, 2027-yildan boshlab patent bo‘yicha belgilangan avans to‘lovini hisoblashda qo‘llaniladigan hududiy koeffitsiyent 3,05 darajasigacha ko‘tariladi. Ushbu o‘zgarish natijasida turli tashkilotlar, yakka tartibdagi tadbirkorlar, notariuslar va advokatlar qo‘lida mehnat qiluvchi xorijlik ishchilar uchun oylik patent narxi 11 ming rubl etib belgilanadi. Jismoniy shaxslar xonadonida shaxsiy, uy-ro‘zg‘or va boshqa shu kabi vazifalarni bajaruvchi migrantlar esa patent uchun 15,6 ming rubl miqdorida to‘lov amalga oshirishlariga to‘g‘ri keladi.
Qonun loyihasi mualliflarining dastlabki hisob-kitoblariga ko‘ra, to‘lov miqdorining oshirilishi Sankt-Peterburg shahar budjetiga kamida 17 milliard rubl qo‘shimcha daromad keltirishi kutilmoqda. Ta’kidlanishicha, 2027-yil uchun xuddi shunday hududiy koeffitsiyent ko‘rsatkichi avvalroq Leningrad viloyati rasmiylari tomonidan ham tasdiqlangan edi.
Ma’lumot o‘rnida, 2026-yilda Sankt-Peterburgda mehnat migrantlari uchun patent to‘lovi 8 ming rublni tashkil etmoqda. Shahar ma’muriyati 2018-yildan buyon xorijiy ishchilar uchun patent narxini har yili muntazam ravishda oshirib kelmoqda.







