Makkaga yo‘l olgan yuzlab qirg‘izistonlik Toshkent aeroportida qolib ketdi. Qirg‘iziston qo‘shni davlatlar orqali umraga bormaslikka chaqirdi

Qirg‘iziston musulmonlari idorasi mamlakat fuqarolarini qo‘shni davlatlar orqali Umra ziyoratiga bormaslikka chaqirdi. Bu haqda “24.kg” xabar berdi.
Ushbu chaqiriq yuzdan ortiq qirg‘izistonlik ziyoratchilar Toshkent aeroportidan Umraga uchib keta olmaganidan so‘ng yangradi. Ularni Qirg‘izistonga qaytarish masalalari idoralararo komissiyaning shoshilinch yig‘ilishida muhokama qilingan.
Chaqiriq “Nur Umra Travel” MChJ orqali sertifikat olgan fuqarolarga, shuningdek, Umra safariga borishni rejalashtirayotgan barcha qirg‘izistonliklarga qaratilgan. Qirg‘iziston Muftiyati Umra safariga Bishkek va O‘sh aeroportlaridan uchishni tavsiya qilgan. SalamAir, Air Arabia va Flyadeal aviakompaniyalari har kuni ziyoratchilarni Saudiyaga jo‘natish imkonini berishi ta’kidlangan.
Idoralararo komissiya yig‘ilishida “Nur Umra Travel” rahbari Mirzat Qo‘shoyevaning tushuntirishlari ham tinglangan. Komissiya fuqarolarni Qirg‘izistonga qaytarish masalasini tezkorlik bilan hal etishni talab qilgan. Kompaniya vakillariga ziyoratchilar holidan xabar olib, vaziyatni hal qilishda ishtirok etish majburiyati yuklangan.
Bundan tashqari, Toshkentga muftiy o‘rinbosarini yuborishga qaror qilingan. U Qirg‘izistonning O‘zbekistondagi elchixonasi bilan birgalikda vatandoshlari bilan uchrashishi kerak. Toshkent aeroportida qolib ketgan qirg‘izistonlik ziyoratchilarning aniq soni va ularning parvoz qila olmaganiga sabab bo‘lgan holatlar ochiqlanmagan.
Ma’lum bo‘lishicha, qirg‘izistonlik ziyoratchilar yetti kundan beri Toshkentdan Saudiya Arabistoniga ucha olmayapti. 16-noyabr kuni Qirg‘iziston parlamenti deputati Burul Amanova 104 nafar qirg‘izistonlik Toshkentda qolib ketayotganini aytgan. Ularning aksariyati Jalolobod va Botken viloyatlari aholisi. Ziyoratchilar orasida keksalar va sog‘lig‘i bilan bog‘liq muammolari mavjudlari ham bor.
Deputatning so‘zlariga ko‘ra, ziyoratchilar safar xarajatlarini to‘liq qoplagan. Bundan tashqari, yana 100 dollardan qo‘shimcha to‘lov ham qilgan. Shunga qaramay, “Nur Umra” kompaniyasi vakillari safarni davom ettirish uchun har bir ziyoratchidan yana 400 dollar talab qilgan. Fuqarolar esa qayta to‘lov qilishdan bosh tortgan.
- #umra
- #Qirg‘iziston








