O‘zbekistonda to‘rtta bank islomiy bank faoliyati uchun litsenziya oldi

Markaziy banki to‘rtta tijorat bankiga islomiy bank faoliyatini amalga oshirish uchun litsenziya berdi. Endi “Ipak Yo‘li”, “Asia Alliance Bank”, “Orient Finans” va “Hayot Bank” qonunda belgilangan islomiy moliya operatsiyalarini amalga oshirishi mumkin.
Markaziy bank xabariga ko‘ra, litsenziyalar uning boshqaruvi tomonidan 2026-yil 18-noyabrda qabul qilingan qarorlar asosida berildi. Litsenziya olgan banklar ro‘yxati quyidagilardir:
“Ipak Yo‘li” aksiyadorlik innovatsiya tijorat banki;
“Asia Alliance Bank” aksiyadorlik tijorat banki;
“Orient Finans” xususiy aksiyadorlik tijorat banki;
“Hayot Bank” aksiyadorlik jamiyati.
Litsenziyalar ushbu banklarga “Banklar va bank faoliyati to‘g‘risida”gi qonunning 5¹-moddasida nazarda tutilgan islomiy moliya operatsiyalarini amalga oshirish huquqini beradi.
Markaziy bank xabarida banklar mijozlarga qaysi islomiy moliya xizmatlarini taklif qilishi va ular qachondan yo‘lga qo‘yilishi ko‘rsatilmagan. Ya’ni litsenziya berilgani bankka bunday xizmatlarni ko‘rsatish huquqini beradi, ammo xizmatlar ishga tushganini anglatmaydi.
Markaziy bank mijozlarga islomiy bank xizmatlaridan foydalanishdan oldin tanlagan bankida tegishli litsenziya bor-yo‘qligini o‘zining rasmiy sayti orqali tekshirishni tavsiya qildi.
Avvalroq, O‘zbekistonda moliyaviy muammoga duch kelgan banklarni sanatsiya qilish tartibi belgilangani haqida xabar bergan edik.
- #Banklar
- #Islomiy litsenziya








