Endi Abu Ali ibn Sino nomidagi Jamoat salomatligi texnikumi bitiruvchilari Germaniyada ishlashi mumkin
Dastur “texnikumdan Germaniya klinikalarigacha” bo‘lgan to‘liq yo‘lni qamrab oladi. Ishtirokchilar nemis tilini B2 darajasigacha o‘rganadilar, Germaniya tibbiyot standartlari asosida maxsus modullardan o‘tadilar va o‘qish yakunida nemis klinikalarida mehnat shartnomasi asosida ishga joylashadilar. Bitiruvchilar O‘zbekiston va Germaniya tomonidan tan olinadigan diplom hamda B2 sertifikatiga ega bo‘ladilar. Bu ularga Germaniyada to‘g‘ridan-to‘g‘ri malakali o‘rta tibbiyot xodimi sifatida ishlash huquqini beradi.
Loyiha Migratsiya agentligi, Sog‘liqni saqlash vazirligi, Oliy ta’lim, fan va innovatsiyalar vazirligi, Germaniyaning Aachen universitet klinikasi hamda Shveysariyaning “Globogate Concept AG” kompaniyasi hamkorligida amalga oshirilmoqda. U Abu Ali ibn Sino nomidagi 15 ta jamoat salomatligi texnikumida bosqichma-bosqich joriy etilmoqda.
Dastur 2024-yilda O‘zbekiston Prezidenti Shavkat Mirziyoyev ishtirokida imzolangan O‘zbekiston–Germaniya migratsiya va mobillik bo‘yicha hamkorlik bitimi asosida rivojlanmoqda. 2025/2026 o‘quv yili uchun Prezident tomonidan 750 ta maxsus kvota ajratilgan edi. Keyingi bosqichda bu ko‘rsatkich 1 500 tagacha oshirilishi rejalashtirilgan.
Ishtirokchilarga til kurslari, stipendiya, turar joy, hujjatlarni tarjima va tasdiqlash, viza hamda aviachipta xarajatlari grant hisobidan qoplanadi. Germaniyada ishga kirgandan so‘ng boshlang‘ich maosh taxminan 1 900 yevrodan boshlanib, diplom rasman tan olingach 2 500 yevro va undan yuqori bo‘lishi mumkin. Oilani olib ketish imkoniyati ham mavjud.
Eslatib o‘tamiz, so‘nggi oylarda Prezident tomonidan sog‘liqni saqlash tizimini rivojlantirish bo‘yicha bir qator muhim hujjatlar qabul qilingan. Xususan, 2026-yil 5-maydagi PF-74-son Farmoni tibbiyot sohasida xususiy sektorni qo‘llab-quvvatlashga, PF-77-son Farmoni esa sog‘liqni saqlash tizimida boshqaruv samaradorligini oshirishga qaratilgan. Ushbu ichki islohotlar mamlakatda malakali tibbiyot kadrlarini tayyorlashni kuchaytirishga xizmat qiladi, xorijiy dasturlar esa yosh mutaxassislar uchun qo‘shimcha xalqaro imkoniyatlar yaratmoqda.
