Saida Mirziyoyeva urbanistlar bilan Toshkentdagi qurilishlar va infratuzilma inqirozini muhokama qildi
Toshkent shahrining shiddat bilan kengayib borayotgani hamda mavjud shaharsozlik vaziyati mutaxassislar va soha vakillari ishtirokida jiddiy tahlil qilindi. Muloqotda yirik me’moriy loyihalar tashabbuskorlari, mustaqil ekspertlar, ijodiy studiyalar hamda OTM vakillari poytaxtning ekologik holati, muhandislik kommunikatsiyalari va ijtimoiy obyektlarga tushayotgan bosimni kamaytirish choralarini ko‘rib chiqqan.
Uchrashuvda elektr va suv ta’minotidagi uzilishlar hamda kommunal tizimlar zo‘riqishining oldini olish bosh masalalardan biri bo‘ldi. Administratsiya rahbari har qanday yangi bunyodkorlik loyihasi avvalo shahar infratuzilmasining imkoniyatlari bilan mutanosib ravishda amalga oshirilishi zarurligini alohida ta’kidlagan.
Shu bilan birga, Toshkentni aholi va mehmonlar uchun qulay, ozoda hamda xavfsiz maskanga aylantirishga qaratilgan har qanday tadbirkorlik tashabbuslari davlat rahbari tomonidan qo‘llab-quvvatlanishi bildirildi. Shaharsozlikda ekologik muvozanat va infratuzilma barqarorligini ta’minlaydigan biznes loyihalariga har tomonlama ko‘mak berilishi belgilangan.
