Tijorat va islomiy banklar uchun yangi talablar belgilandi
Yangi tartibga ko‘ra, barcha tijorat, mikromoliya va islomiy bank faoliyatini yurituvchi muassasalarning aktivlari “standart”dan “umidsiz”gacha bo‘lgan 5 ta toifaga ajratiladi. Risk darajasiga qarab banklar ushbu aktivlar bo‘yicha 1 foizdan 100 foizgacha zaxira shakllantirishi shart etib belgilandi. Agar aktivni tasniflashda turli mezonlar bo‘yicha natijalar farq qilsa, bank eng yomon toifani tanlashga majbur bo‘ladi va zaxiralar oyiga kamida bir marta qayta ko‘rib chiqiladi.
Shuningdek, qayta restrukturizatsiya qilingan aktivlar sifatini yaxshilash uchun kamida 6 oydan 12 oygacha bo‘lgan sinov davri belgilandi. 2028-yil 1-yanvardan e’tiboran muammoli aktivlarga "foizlarni o‘stirmaslik" maqomi berilishi va olinmagan daromadlar balansdan tashqari hisobvaraqlarga o‘tkazilishi ko‘zda tutilgan. Shu bilan birga, aktivni zaxira hisobidan balansdan tashqariga o‘tkazish qarzdorning majburiyatini bekor qilmaydi.
Ikkinchi hujjat bilan banklarni sanatsiya qilish va moliyaviy sog‘lomlashtirish jarayonida baholash o‘tkazish tartibi amaliyotga kiritildi. Markaziy bank tanlab oladigan mustaqil baholovchi tashkilotlar sanatsiyaga tushgan bankning aktiv va majburiyatlarini baholab, aksiyadorlar va kreditorlar ko‘rgan zararlarni tugatish (likvidatsiya) ssenariysi bilan taqqoslagan holda aniqlaydi. Baholash xarajatlari dastlab bank, imkon bo‘lmaganda esa Markaziy bank mablag‘lari hisobidan qoplanadi.
