Javohir Sindarov va Gukesh Dommaraju shaxmat tarixidagi eng yosh jahon chempionligi uchun bahslashadi
Xalqaro shaxmat federatsiyasi (FIDE) joriy yilning 22-noyabr idan 13-dekabriga qadar Shveysariyaning Jeneva shahrida o‘tkaziladigan jahon chempionati reglamentini e’lon qildi. Martin Bodmer jamg‘armasi muzeyida bo‘lib o‘tadigan ushbu tarixiy to‘qnashuvda amaldagi chempion, hindistonlik Gukesh Dommaraju hamda O‘zbekiston vakili Javohir Sindarov o‘zaro kuch sinashadi. Javohir Sindarov mamlakatimiz tarixida mutlaq jahon chempionligi toji uchun don suradigan birinchi shaxmatchiga aylanadi.
Musobaqaning rasmiy ochilish marosimi 22-noyabrga mo‘ljallangan bo‘lib, dastlabki klassik partiya 24-noyabr kuni start oladi. Umumiy hisobda maksimal 14 ta klassik o‘yindan iborat bo‘ladigan bahslarda birinchi bo‘lib 7,5 ochko to‘plagan shaxmatchi g‘olib deb topiladi. Agar so‘nggi klassik o‘yin o‘tkaziladigan 11-dekabrdan keyin hisob teng bo‘lib qolsa, chempion nomi 12-dekabr kuni o‘tkaziladigan tay-breykda aniqlanadi.
Uchrashuv start olgan vaqtda har ikki shaxmatchi ham 20 yoshda bo‘lishi sababli, ushbu qarama-qarshilik shaxmat solnomasidagi eng yosh jahon chempionati bahsi sifatida tarixga kirishi kutilmoqda. Bellashuvning umumiy mukofot jamg‘armasi esa 2,5 million AQSh dollarini tashkil etadi.
