O‘zbekistonda pensiya yoshini bosqichma-bosqich oshirish taklif qilinmoqda
O‘zbekistonda pensiya yoshini bosqichma-bosqich oshirish taklif qilinmoqda. Jamoatchilik muhokamasiga qo‘yilgan prezident farmoni loyihasida 2028-yil 1-yanvardan pensiya yoshini har yili 3 oydan oshirib borish rejalashtirilmoqda. Natijada 2039-yilga kelib pensiya yoshi erkaklar uchun amaldagi 60 yoshdan 63 yoshga, ayollar uchun 55 yoshdan 58 yoshga yetkazilishi ko‘zda tutilgan.
Hujjatda pensiya yoshini oshirish, minimal ish stajini uzaytirish va jamg‘arib boriladigan pensiya tizimini yangilash taklif etilgan. Loyihaga ko‘ra, 2027-yildan yoshga doir pensiya olish uchun talab etiladigan kamida 7 yillik ish stajini har yili bir yildan oshirib, 2034-yilda 15 yilga yetkazish taklif qilinmoqda. Yetarli stajga ega bo‘lmagan fuqarolarning belgilangan pensiya yoshidan besh yil o‘tgach yoshga doir nafaqa olish huquqi saqlanib qoladi.
Yana bir muhim o‘zgarish jamg‘arib boriladigan pensiyaga taalluqli. 2027-yildan ayrim fuqarolar o‘z hisobvarag‘iga ish haqining 5 foizini ixtiyoriy o‘tkazsa, davlat budjetidan ushbu mablag‘ga 50 foizgacha qo‘shimcha to‘lov berish taklif etilmoqda. Fuqarolarga pensiya jamg‘armalarini investitsiya vositalariga joylashtirish imkoniyati ham berilishi mumkin.
2030-yildan esa jamg‘arilgan pensiya mablag‘larini og‘ir kasallikni davolash yoki ipoteka krediti uchun boshlang‘ich to‘lovga ishlatishga ruxsat berish ko‘zda tutilgan.
Bundan tashqari, 2027-yildan 55 yoshdan oshgan ayollar va 60 yoshdan oshgan erkaklar uchun o‘rtacha ish haqi saqlangan holda qisqartirilgan ish vaqtini joriy etish taklif qilingan.
Hozircha bu farmon loyihasi bo‘lib, undagi takliflar yakuniy tartib sifatida kuchga kirgani yo‘q. Muhokamalar 30-sentyabrga qadar davom etadi.
