Bank kartangiz bloklansa, sababini bilish uchun endi Markaziy bankka borish shart emas
O‘zbekistonda bank kartasi bloklanganda uni qaysi idora, qachon va nima sababdan to‘sganini tijorat bankining o‘zidan tezkor aniqlash imkonini beruvchi InfoCards tizimi ishga tushirildi.
Markaziy bank ma’lumotlariga ko‘ra, yangi joriy etilgan InfoCards tizimi tijorat banklari, to‘lov tashkilotlari hamda huquqni muhofaza qiluvchi organlar o‘rtasida tezkor axborot almashinuvini ta’minlaydi. Bu orqali plastika kartalarga qo‘yilgan taqiqlarga oid barcha ma’lumotlar yagona bazaga jamlanadi.
Endilikda karta egasi o‘z hisobvarag‘i bloklanib qolganida sababini bilish uchun Markaziy bankka murojaat qilib yurishiga hojat qolmaydi. Fuqaro shunchaki o‘ziga xizmat ko‘rsatuvchi tijorat bankiga murojaat qilishi kifoya qiladi va bank xodimlari tizim orqali barcha ma’lumotlarni ko‘rib bera oladi.
Bank InfoCards platformasi orqali cheklovni qaysi huquqni muhofaza qiluvchi organ qo‘ygani, taqiq qo‘yilgan vaqt hamda uning aniq sabablari haqida mijozga joyida tushuntirish beradi. Ushbu yangilik fuqarolarning ortiqcha ovoragarchiliklariga barham berib, bank xizmatlarida shaffoflik va tezkorlikni oshirishga xizmat qiladi.
