Farg‘onada bajarmagan ishi uchun 283 tonna asfaltni “qo‘shib yozgan” mansabdorlarga jinoyat ishi ochildi
Bosh prokuratura huzuridagi Iqtisodiy jinoyatlarga qarshi kurashish departamenti tomonidan o‘tkazilgan tergovga qadar tekshiruvda Qo‘shtepa tumani Obodonlashtirish boshqarmasining noqonuniy harakatlari yuzaga chiqdi. Mas’ul shaxslar xususiy korxona hamda mas’uliyati cheklangan jamiyat bilan umumiy qiymati 3,9 milliard so‘mga teng bo‘lgan 6 ming tonnadan ziyod asfalt xarid qilish bo‘yicha shartnomalar tuzgan.
Hujjatlarga ko‘ra, ushbu xomashyo tumandagi 26 ta mahalla fuqarolar yig‘inida joylashgan 61 ta ko‘chani ta’mirlashga yo‘naltirilishi kerak bo‘lgan. Biroq o‘rganishlar davomida amalda umuman bajarilmagan ishlar uchun soxta ma’lumotlar kiritilib, 283 tonna asfalt oshirib ko‘rsatilgani hamda shu yo‘l bilan 158,7 million so‘mlik davlat mablag‘i o‘zlashtirib yuborilgani ma’lum bo‘ldi.
Hozirda ushbu holat yuzasidan tumanning Obodonlashtirish boshqarmasi mas’ullariga nisbatan Jinoyat kodeksining 167-moddasi (O‘zlashtirish yoki rastrata yo‘li bilan talon-toroj qilish) hamda 228-moddasi (Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bo‘yicha jinoyat ishi qo‘zg‘atildi. Tergov harakatlari davom ettirilmoqda.
