O‘zbekistonga 8 oyda 9 milliondan ortiq turist keldi
Milliy statistika qo‘mitasining ma’lum qilishicha, yanvar–avgust oylarida mamlakatimizga turistik maqsadlarda kelgan chet el fuqarolari soni 9 102 729 nafarni tashkil etdi. Bu ko‘rsatkich o‘tgan yilning shu davri bilan taqqoslaganda 1,6 million nafarga yoki 21,1 foizga ko‘payganini ko‘rsatmoqda.
O‘zbekistonga tashrif buyurgan xorijliklar orasida qo‘shni davlatlar fuqarolari yetakchilik qilmoqda. Eng ko‘p turist Qirg‘izistondan kelgan bo‘lib, u yerdan 2,5 milliondan ortiq kishi tashrif buyurgan. Keyingi o‘rinlarni 2,1 milliondan ziyod ko‘rsatkich bilan Qozog‘iston hamda 2 milliondan ortiq sayyoh bilan Tojikiston egalladi.
Shuningdek, Rossiyadan 867 mingdan ziyod, Afg‘onistondan 329 ming va Xitoydan 318 mingdan ortiq fuqaro turistik maqsadlarda kelgan. Turkmaniston, Turkiya, Hindiston hamda Germaniyadan tashrif buyurganlar soni ham barqaror o‘sishni ko‘rsatgan.
