“Diniy ekstremizm” tushunchasi qonunlardan olib tashlandi. Adashib taqiqlangan narsa saqlaganlarga birinchi safar ma’muriy jarima beriladi
Ilgari ekstremistik mazmundagi materiallarni tayyorlash, saqlash yoki tarqatish kabi holatlar birdaniga jinoiy javobgarlikka sabab bo‘lar edi. Senat ma’qullagan yangi qonun bilan mazkur tartib yumshatildi: endilikda ushbu qilmishlar birinchi marta sodir etilganda fuqaro ma’muriy javobgarlikka tortiladi. Jinoiy javobgarlik esa faqat ma’muriy jazo qo‘llanganidan so‘ng xatti-harakat takrorlansa yuzaga keladi. Shuningdek, xavfli materiallar haqida o‘z vaqtida organlarga xabar berib, salbiy oqibatlarning oldini olishga ko‘maklashgan shaxslar javobgarlikdan ozod qilinishi belgilandi.
Shu bilan birga, taqiqlangan tashkilotlar bilan bog‘liq jazolar tabaqalashtirildi. Ilgarigi amaliyotda bunday guruhlarni tuzish, rahbarlik qilish va shunchaki unda ishtirok etish uchun bir xil – 15 yilgacha ozodlikdan mahrum etish jazosi ko‘zda tutilgan edi. Endi esa oddiy ishtirokchilar uchun yengilroq, tashkilotchi va rahbarlar uchun esa og‘irroq sanksiyalar tatbiq etiladi. Shu bilan birga, “diniy ekstremizm” iborasi chiqarilib, o‘rniga shunchaki “ekstremizm” atamasi kiritildi va ushbu tushunchaga aniq 8 ta harakat doirasidan iborat qat’iy ta’rif berildi.
Islohotlar doirasida ekstremizmga qarshi kurashish bo‘yicha Prezident tomonidan tasdiqlanadigan Davlat dasturlari ishlab chiqilishi hamda taqiqlangan materiallar va tashkilotlarning yagona elektron reyestri yo‘lga qo‘yilishi rejalashtirilgan.
Bundan tashqari, noqonuniy faoliyat haqida o‘z vaqtida xabar bergan shaxslarning xavfsizligi davlat tomonidan kafolatlanib, ularni moddiy va ma’naviy rag‘batlantirish tizimi joriy etiladi.
