O‘zbekistonda 10 yoshdan katta aholining 97,3 foizi internetdan foydalanmoqda
Ushbu ko‘rsatkich so‘nggi yillarda mamlakatda raqamlashtirish va aloqa infratuzilmasi jadal rivojlanayotganini ko‘rsatadi. Taqqoslash uchun, 2021-yilda internetdan foydalanuvchilar ulushi 76,6 foizni tashkil etgan bo‘lsa, joriy yilning avgust oyiga kelib bu ko‘rsatkich 20,7 foiz bandga o‘sgan.
O‘tkazilgan tahlillar natijasida ajoyib dinamika kuzatildi: 2022-yilda ko‘rsatkich 83,9 foizga, 2023-yilda 89 foizga, 2024-yilda 93,3 foizga va 2025-yilda 94,6 foizga yetgan edi. Natijada so‘nggi besh yillik davr mobaynida 10 yosh va undan katta aholining tarmoqdan foydalanish darajasi salkam 1,3 baravarga ko‘paydi.
Ushbu ma’lumotlar Milliy statistika qo‘mitasi tomonidan o‘tkazilgan uy xo‘jaliklarining tanlanma kuzatuvlari natijalariga tayanadi. Mamlakatda raqamli texnologiyalarning ommalashuvi va internet qamrovining kengayishi barcha yosh guruhlari orasida onlayn xizmatlarga bo‘lgan talabni yanada oshirib bormoqda.
