“Yandex” data-markazlaridagi uskunalarni yangilashga olti oy ketishi mumkin
8–11-oktyabr kunlari Rossiyadagi uch joydagi “Yandex” data-markaziga qilingan hujumlar oqibatida kompaniya infratuzilmasining bir qismi ishdan chiqdi. Natijada bir qator mashhur onlayn xizmatlar vaqtincha uzilib qolgan. IT bozori manbalari ta’kidlashicha, shikastlangan uskunalarni yangilash olti oygacha cho‘zilishi mumkin.
11-oktyabr kuni Vladimir shahridagi “Yandex” data-markazi infratuzilmasi shikastlangani va obyekt ishi to‘liq to‘xtatilgani “Yandex Cloud” ogohlantirishida aytilgan. Kompaniya qolgan resurslar konfiguratsiyasi barqaror emasligini va platforma favqulodda rejimda ishlayotganini ma’lum qilgan. Shu bilan birga, “Yandex” 10-oktyabrda o‘z foydalanuvchi kelishuvlariga BPLA hujumlarini ya’ni uchuvchisiz uchish aparatlarini fors-major holati sifatida kiritgan.
Birinchi hodisa 8-oktyabr kuni Ryazan viloyatidagi Sasovo shahridagi data-markazda yuz bergan. 9-oktyabr kuni Kaluga shahridagi obyektga ta’sir qilgani, 11-oktyabr kuni esa Vladimir shahridagi data-markaz ishini to‘xtatgani ma’lum qilingan. Shuningdek, 11-oktyabr kuni “Yandex Go”, “Yandex Pay”, “Yandex Musiqa”, “Kinopoisk”, “Alisa”, Qidiruv, Xaritalar, Pochta va “Uy” xizmatlarida uzilishlar qayd etilgan. Ushbu data-markazlarda kompaniyaning asosiy superkompyuterlari joylashgani ham xabar qilingan.
“Yandex” shikastlangan uskunalarni tezroq almashtirish maqsadida ularni bir nechta kanal orqali, xususan xorijiy ta’minotchilar hisobiga olishga urinishi mumkin. Biroq bunday xaridlar qo‘shimcha xarajat keltirishi va bulutli xizmatlar narxining oshishiga olib kelishi mumkin. 12-oktyabr kuni Mintsifry rahbari Maksut Shadayev hujumlarni “bespretsedent” deb baholadi va data-markazlarni himoya qilish choralari Mintsifry hamda Minoborona tomonidan muhokama qilinayotganini bildirdi.
