Xakerlar Dodo pizza tarmog‘ining ma’lumotlar bazasini qo‘lga kiritib, uni darknetda 100 ming dollarga sotib yubordi
“Dodo Pizza” o‘zining IT-tizimi hakerlar hujumiga uchraganini ma’lum qildi. Kiberhujum natijasida kompaniya mijozlari ma’lumotlarining katta qismi o‘g‘irlangan.
Kiberhujum 27-28 sentabr kunlari amalga oshirilgan. Xabarlarga ko‘ra, sizdirilgan ma’lumotlar massivida jami 33 milliard yozuv mavjud bo‘lib, unga 15 yil davomidagi 862 millionta buyurtma tarixi, 171 millionta yetkazib berish manzili, 68 million mijoz va 431 ming xodimning shaxsiy ma’lumotlari kiradi.
“To‘lov ma’lumotlarini bazada saqlamaymiz, ular xavfsiz”, — deya bayonot bergan kompaniya. Ta’kidlanishicha, “Dodo Pizza” ma’lumotlariga kirishi bloklangan, ichki tekshiruv o‘tkazilmoqda.
Huquq-tartibot idoralari ma’lumotiga ko‘ra, to‘rt kishidan iborat xakerlar (Rossiya, Qozog‘iston, Belarus va tasdiqlanmagan ma’lumotga ko‘ra O‘zbekiston fuqarosi) jinoiy guruhining uch nafar a’zosi allaqachon qo‘lga olingan.
“Dodo Pizza” Rossiyaning yirik pitseriya tarmog‘I hisoblanadi. Kompaniya Rossiyadan tashqari yana 27 ta mamlakatda bir yarim mingdan ortiq shoxobchaga ega. Jumladan, kompaniya O‘zbekistonda ham faoliyat olib boradi.
