Toshkentda bolalar saratonini davolash va diagnostikasi uchun 174 million yevrolik ulkan tibbiyot majmuasi quriladi

Loyiha doirasida ajratiladigan mablag‘ning 139 million yevrosi Bolalar onkologiyasi, gematologiyasi va immunologiyasi ilmiy-amaliy tibbiyot markazi negizida yangi binolarni qurish hamda jihozlashga yo‘naltirildi. Yangi korpusda nur terapiyasi, yadro tibbiyoti va zamonaviy diagnostika usullari, jumladan siklotron, MRT hamda PET/KT apparatlari o‘rnatiladi. Shuningdek, 56 o‘rinli kunduzgi statsionar tashkil etilib, bolalar muolajadan so‘ng uyiga javob beriladigan tizim yo‘lga qo‘yiladi.

Qolgan 35 million yevro mablag‘ Bolalar saratoni bo‘yicha xalqaro akademik xabni rivojlantirish, tibbiyot xodimlarini tayyorlash va ilmiy tadqiqotlarni moliyalashtirishga ajratiladi. Asosiy maqsad – murakkab va o‘ta ixtisoslashtirilgan davolash muolajalarini mamlakat ichida yo‘lga qo‘yish hamda bemorlarning xorijga borish zaruratini kamaytirishdan iborat.

Ushbu loyihani xalqaro moliya tashkilotlarining uzoq muddatli kreditlari hisobidan moliyalashtirish ko‘zda tutilgan. Hozircha aniq kreditor va yakuniy moliyalashtirish shartlari kelishuv bosqichida bo‘lib, kelgusi yillarda qurilish va jihozlash ishlarining jadvali aniqlashtiriladi.