O‘zbeksitonda banklar kredit to‘lovi uchun kartadan pul yechganda kamida 680 ming so‘m qoldiradi
Markaziy bank tijorat banklari uchun yangi talab joriy qilmoqda. Unga ko‘ra, bank mijoz bilan tuzilgan shartnomada kredit yoki kafillik to‘lovlarini mijozning topshirig‘isiz uning bank kartasidan yechib olishni nazarda tutgan bo‘lsa, pul yechilgandan keyin kartada belgilangan miqdor saqlab qolinishi kerak.
Yangi qoidaga muvofiq, mijoz kartasidagi qoldiq mehnatga haq to‘lashning eng kam miqdorining kamida yarmidan kam bo‘lmasligi lozim. Ya’ni bank avtomatik tarzda kredit to‘lovini yechgach, hisobvaraqda ushbu miqdorning yarmi qolishi shart.
2026-yil 1-sentabrdan mehnatga haq to‘lashning eng kam miqdori 1 mln 360 ming so‘m etib belgilangan. Agar bu miqdor talab kuchga kirguniga qadar o‘zgarmasa, bank to‘lovni yechganidan keyin mijoz kartasida kamida 680 ming so‘m qolishi kerak bo‘ladi.
Markaziy bank qaroriga ko‘ra, yangi talab 2027-yil 10-yanvardan kuchga kiradi.
