Banklarni moliyaviy sog‘lomlashtirish tartibi belgilandi - Omonatlar qanday himoyalanadi?

O‘zbekistonda moliyaviy muammoga duch kelgan banklarni sanatsiya qilish tartibi belgilandi. Bu jarayonda bank zararini qoplash uchun kafolatlangan omonatlardagi pulni hisobdan chiqarish yoki aksiyalarga aylantirish mumkin emas. Zararlar birinchi navbatda bank aksiyadorlari hisobidan qoplanadi.
Adliya vazirligi banklarni sanatsiya qilish tartib-taomillarini amalga oshirishga oid hujjatni 2026-yil 16-noyabrda 3976-raqam bilan davlat ro‘yxatidan o‘tkazdi. Hujjat “Banklarni sanatsiya qilish va tugatish to‘g‘risida”gi qonun ijrosini ta’minlash maqsadida qabul qilingan.
Sanatsiya — moliyaviy qiyinchilikka uchragan bankning muhim xizmatlarini saqlab qolish va moliyaviy muammolarini tartibli hal etishga qaratilgan maxsus choralar majmui hisoblanadi. Bunda omonatchilarning huquq va manfaatlarini himoya qilish, bank xizmatlarining uzluksizligini hamda moliyaviy barqarorlikni ta’minlash ko‘zda tutilgan.
Hujjatga ko‘ra, sanatsiya jarayonida bankning aktivlari va majburiyatlari, jumladan kreditlari hamda omonatlari boshqa bankka o‘tkazilishi yoki sotilishi mumkin. Omonatlar boshqa bankka o‘tkazilganda, omonatchilardan yangi bank hisobvarag‘i shartnomasini tuzish talab etilmaydi.
Bankning muhim xizmatlarini davom ettirish uchun oraliq bank tashkil etish imkoniyati ham nazarda tutilgan. Bunday vaqtinchalik bank ikki yilgacha faoliyat yuritadi. Aktivlar va majburiyatlar boshqa bankka yoki oraliq bankka o‘tkazilayotganda bank xizmatlarining uzluksizligini ta’minlash choralari ko‘riladi.
Sanatsiyaning yana bir vositasi bank kapitali va ayrim majburiyatlarini hisobdan chiqarish yoki aksiyalarga aylantirishdan iborat. Bu chora bank zararlarini qoplash uchun qo‘llanadi. Biroq kafolatlangan omonatlar, jumladan ularning kafolatlash chegarasidan oshadigan qismi ham hisobdan chiqarilmaydi va aksiyalarga aylantirilmaydi.
Avvalroq, O‘zbekistonda inflyatsiya 2027-yil oxirigacha 5 foizga tushishi va iqtisodiy o‘sish 7,5 foizgacha jadallashishi kutilmoqdaligi haqida xabar bergan edik.
- #Sanatsiya
- #Banklar








