Jizzaxda 500 million dollarga qurilgan yangi IES ish boshladi

Jizzax viloyatining Sharof Rashidov tumanida barpo etilgan yangi issiqlik elektr stansiyasi 20-noyabr kuni O‘zbekiston Yagona elektr energetika tizimiga ulanib, tarmoqqa elektr energiyasi uzatishni boshladi.
Umumiy qiymati 500 million dollarga teng bo‘lgan mazkur yirik obyekt Turkiyaning Cengiz Enerji kompaniyasi hamda uning Cenergo loyiha kompaniyasi ishtirokida amalga oshirildi. Foydali ish koeffitsiyenti 60 foizdan yuqori bo‘lgan zamonaviy Siemens Energy SGT5-4000F bug‘-gaz turbinalari bilan jihozlangan stansiya yiliga 4,4 milliard kilovatt-soat elektr energiyasi ishlab chiqarish hamda 500 million kub metrgacha tabiiy gazni tejash imkonini beradi.
Qurilish ishlari 2023-yil avgust oyida boshlangan loyiha prezidentning 2023-yil 8-noyabrdagi qarori asosida to‘g‘ridan-to‘g‘ri xorijiy investitsiyalar hisobiga ro‘yobga chiqarildi, shuningdek, uni moliyalashtirish uchun DZ BANK va DenizBank AG moliya institutlaridan 164,25 million yevro miqdorida uzoq muddatli kredit jalb etildi. Kelishuv shartlariga muvofiq, Cenergo kompaniyasi stansiyani loyihalash, qurish va ekspluatatsiya qilish majburiyatini olgan bo‘lsa, “O‘zenergosotish” aksiyadorlik jamiyati bu yerda ishlab chiqarilgan elektr energiyasini 25 yil davomida kafolatli xarid qilib boradi.
Dastlab 2025-yilda ishga tushirilishi ko‘zda tutilgan, biroq muddatlari bir necha bor qayta ko‘rib chiqilgan ushbu obyektni Jizzax viloyati hokimligi 2026-yil dekabr oyi oxirigacha to‘liq foydalanishga topshirishni rejalashtirgan edi. Energetika vazirligi mazkur stansiyaning ishga tushirilishi mamlakatning generatsiya quvvatlarini sezilarli darajada oshirishiga va iste’molchilarni barqaror elektr energiyasi bilan ta’minlash ishonchliligini mustahkamlashiga xizmat qilishini ta’kidladi.







