Chegirmalar rostdan ham pulimizni tejaydimi?
Do‘kon, bozor va supermarketlardagi arzonlashtirilgan narxlar — chegirmalar xaridor uchun rostdan ham foydalimi? Keling, tushuntiramiz.
Chegirma sizga foyda keltirayotgandek ko‘rinsa-da, do‘kon uchun u, avvalo, savdoni oshirish vositasi. Masalan, ommabop mahsulot arzon narxda taklif qilinadi, xaridor esa uni olish uchun do‘konga kirib, yo‘lda yana bir nechta mahsulotni savatiga qo‘shadi. Natijada bitta mahsulotdagi chegirma boshqa xaridlar hisobidan qoplanishi mumkin. Online do‘konlarda ham xuddi shunday. Online do‘konga kirganingizda bir emas bir nechta mahsulotni olganingizni o'zingiz bilmay qolasiz.
Biz tez-tez qarshilashadigan “Ikkitasini oling, uchinchisi bepul” kabi takliflar ham ko‘proq xarid qilishga undaydi. Bunda mahsulotning birlik narxi pasayishi mumkin, ammo taklif faqat uchta mahsulot olganda amal qiladi. Agar xaridorga aslida bittasi kerak bo‘lsa, qolgan ikkitasi uchun sarflangan pul tejamkorlik hisoblanmaydi.
Shuningdek, “Faqat bugun”, “oxirgi uch dona” kabi yozuvlarga ko‘zingiz tushgan bo‘lsa kerak. Vaqt yoki mahsulot soni cheklangani haqidagi taassurot odamga narxlarni solishtirish va xarid rostdan ham kerakmi, deb o‘ylash uchun kamroq imkon beradi. Shuning uchun bunday vaziyatda shoshmasdan, taklif shartlarini yana bir tekshirsangiz cho‘ntagingiz uchun yanayam foydali bo‘ladi.
Chizib qo‘yilgan eski narx ham mahsulotning avval uzoq vaqt shu narxda sotilganini anglatmasligi mumkin. U tavsiya etilgan narx yoki qisqa muddat amal qilgan narx bo‘lishi ehtimol. Shuning uchun chegirma foiziga emas, mahsulotning hozirgi narxiga va uning kilogramm yoki litr hisobidagi qiymatiga qarash ma’qul. Birlik narxi turli hajmdagi qadoqlarni solishtirishga yordam beradi.
Xaridni rejalash uchun do‘konga ro‘yxat bilan borish foydali: ro‘yxatdagi mahsulotga chegirma tushsa, bu tejamkorlik bo‘lishi mumkin; ro‘yxatda yo‘q va kerak bo‘lmagan mahsulot esa, arzonlashgan taqdirda ham, qo‘shimcha xarajatdir. Yirik xarid bo‘lsa, qarorni bir kunga kechiktirib, mahsulot ertasi kuni ham kerak bo‘ladimi, deb o‘ylab ko‘rish mumkin. Tez buziladigan mahsulotlarni ortiqcha olish ham foyda bermaydi — ishlatilmay qolib tashlansa, “chegirma” xarajatga aylanadi.
Xulosa qilib aytganda, chegirma har doim ham tejash degani emas. Eng foydali xarid — chegirmadagisi emas, rostdan ham kerak bo‘lgani. Aks holda, do‘kon bizga “tejadingiz” degan hissiyot beradi, hamyonimiz esa boshqacha hisob-kitob qiladi.
